Жаңалықтар

Euromoney «ТұранӘлем Банкі» АҚ-ын тағы да Орта Азияның үздік банкі деп таныды

17.07.2007 / Баспасөз орталығы

ТұранӘлем Банкі Euromoney халықаралық басылымы өткізген «Үздік жетістіктері үшін марапаттар» байқауы аясында (Awards for Excellence) орталық-азиялық аймақтағы 2007 жылғы үздік банк атанды.

Қаржы және банк тақырыбына маманданған алуан түрлі 100-ге жуық басылымдар кіретін аса беделді Euromoney журналының бұл марапаты халықаралық қаржы нарығындағы ТұранӘлем Банкі ұстанымдарының беріктігін және оның бағалы қағаздарының қазақстандық және шетелдік инвесторлар үшін тартымдылығын тағы да дәлелдей түсті.

Атап өтерлік бір жайт, Euromoney журналының болжамы бойынша 2005 жылы да «Орта Азиядағы үздік банк» атағына «ТұранӘлем Банкі» АҚ ие болды.

Қазіргі заманда банктік бизнесті жүргізудің барлық объективті қиындықтарына қарамастан ТұранӘлем Банкі «Үздік жетістіктері үшін марапаттар» байқауы аясында өзін көшбасшы қаржы институты ретінде көрсете алды.

«Euromoney белгілеген банктер шын мәнінде бірінші класты қаржы қызметтерін көрсетеді және олар клиенттер тарапынан зор сенімге лайықты. Сіздерге оларды біздің журналымыз ұсынады», - деп атап өтті Орталық және Шығыс Еуропа, Ресей мен ТМД аймағы бойынша Euromoney директоры Мартин Борн.

Жеңімпаз компанияларды таңдау барысында Euromoney сарапшылары банктің нарықтағы ұстанымдарын, нарық үлесін, банктік жаңа өнімдерін, менеджмент жүйесін, қызметкерлерінің кәсіпқойлығын, банктің инновациялық сипатын, қаржы көрсеткіштерін және меншікті капиталының көлемін назарға алды.

«ТұранӘлем Банкі» АҚ (ТӘБ) — ірі банктердің бірі және ТМД аумағындағы банк желісін құруда көшбасшы. Банктің активтері 2007 жылдың І мамырында 20,4 млрд., ал меншікті капиталы 2 млрд. АҚШ долларына жетті. 2007 жылы ТМД-дағы банктің активтерін топтастырып, 2015 жылға дейін 50 млрд. АҚШ долларына дейін жеткізу көзделген. Банктің даму стратегиясы географиялық әртараптандыру мен банк өнімдерінің аясын кеңейтуді, сондай-ақ, негізгі көрсеткіштерін тұрақты және қарқынды дамытуды көздейді.

ТМД елдерінде және алыс шет елдерде өз өнімдерін ұсынатын ТұранӘлем банкі ТМД елдеріндегі қызмет аясын одан әрі кеңейтуде. Украинаға, Ресейдің 4 аймағына, Беларуське, Грузияға, Армения мен Қырғызстанға тарайтын стратегиялық серіктес банктер желісінің болуы осыған дәлел. ТӘБ өкілдіктері Ресейде, Украинада, Қытайда және БАӘ -де жұмыс істейді.

ТұранӘлем Банкінің Қазақстан Республикасының барлық аймағында тармақталған филиалдар желісі бар (22 филиал мен 244 есеп айырысу - кассалық бөлімдері ).